O Consello Provincial de Turismo da Deputación de Lugo celebrou este venres a reunión na que se presentaron as accións que a institución provincial levará a cabo durante o ano 2025 e que se dividen en tres liñas estratéxicas, ademais dos Premios de Turismo, que se celebrarán no mes de setembro.
A reunión estivo presidida pola deputada Pilar García Porto, que explicou que se seguirá apostando por un modelo de turismo “de calidade e sustentable”, deseñado para situar a provincia como “un destino de referencia”. Para iso, establécese unha oferta “diversa e respectuosa co medio ambiente que é capaz de fomentar o desenvolvemento económico local”.
Unha das liñas principais será unha nova edición do programa de viaxes gratuítas ‘Coñece a túa provincia’, que contará este ano coa participación de 132 colectivos sen ánimo de lucro. “Unha acción que deseñamos no 2021 para apoiar a un sector tocado pola pandemia e co que xa conseguimos un retorno económico para a hostalaría e o turismo de máis de 600.000 euros”, valorou a deputada.
A presenza en feiras e eventos turísticos será outra das liñas a seguir este ano, de feito, xa estiveron presentes nestes dous primeiros meses en Fitur, Dakar ou Madrid Fusión, ademais da Volta, na que xa está confirmada a colaboración da entidade provincial; nunha aposta por “a proxección nacional e internacional como un eixo crave na estratexia turística da nosa provincia”, avanzou Pilar García Porto.
Tamén seguirán sendo unha “proposta estratéxica fundamental” as rutas fluviais na Ribeira Sacra. Segundo explicou a deputada, esta oferta superou todas as expectativas o ano pasado con máis de 61.000 viaxeiros nas rutas do Canón do Sil e Cabo do Mundo.
‘E PARA COMER, LUGO’
Ademais, o Consello de Turismo ratificou as bases da sexta edición dos premios á excelencia do turismo da provincia, que manterán as categorías habituais: Lugo Cambia ao Turismo Lucense, Turismo Sostible e …E para comer, Lugo á Gastronomía Lucense.
Un ano máis, poderanse presentar a estes premios, que se entregan en setembro persoas físicas ou xurídicas, institucións e entidades públicas ou privadas, asociacións e colectivos sen ánimo de lucro de ámbito local e autonómico, nacional e internacional unha vez que estas bases se publiquen no Boletín Oficial da Provincia (BOP).
Estes galardóns teñen un carácter honorífico, igual que nas anteriores edicións, e consistirán nun diploma acreditativo e un agasallo.
