A circulación na autovía A-8, ao seu paso polo municipio lucense de Abadín, xa se restableceu despois de permanecer cortada durante a madrugada e a mañá deste luns debido ao envorco dun camión que transportaba vacas. Segundo informou o 112 Galicia, o camión quedou atravesado na calzada á altura do quilómetro 555 desta vía en sentido Vilalba. O sinistro produciuse pouco despois das 04.30 horas. Nese momento, un particular alertou á central de emerxencias deste accidente.
Nesta mesma comunicación, a persoa que chamou ao 112 sinalaba que os implicados saíran xa da cabina polos seus propios medios. Tamén o condutor do camión contactou co Centro Integrado de Atención ás Emerxencias (CIAE-112) para solicitar asistencia sanitaria para o seu acompañante. Así, mobilizáronse ata o lugar medios do Servizo de Urxencias Sanitarias de Galicia-061, da Garda Civil de Tráfico e dos servizos de mantemento da estrada.
