As obras de rehabilitación e permeabilización da presa da Acea de Olga, no río Miño ao seu paso por Lugo, foro suspendidas temporalmente debido ao incremento do río até valores superiores aos 300 m3/s.
Segundo informou a Confederación Hidrográfica do Miño-Sil (CHMS) nun comunicado, o incremento do caudal foi polas condicións meteorolóxicas “extremadamente adversas”.
As fortes precipitacións afectaron a toda a conca do Miño-Sil nos últimos días, ocasionando un aumento moi importante do caudal do río, que superou as proteccións existentes e alagou a zona de traballo, o que derivou na inmediata paralización das actuacións.
Este tipo de interrupcións son previsibles ao ter que traballar nunha contorna fluvial como o do río Miño e que pola súa duración, obrigan a planificar a súa execución en máis dun período de estío.
A pesar desta paralización temporal, a CHMS asegurou que, os elementos construídos ata o momento están “completamente asegurados e preparados para soportar os caudais actuais e futuros”.
Con todo, se as precipitacións cesan e o caudal circulante redúcese ata niveis adecuados, farán unha valoración dos efectos destas últimas enchentes e realizarán intervencións complementarias para asegurar e acondicionar a zona de traballo de cara ao inverno.
