O presidente da Xunta, Alfonso Rueda, informou este luns dun acordo entre as comunidades de Galicia e Asturias para colaborar na prestación de asistencia sanitaria en determinadas zonas limítrofes de ambas as comunidades a través dun convenio autorizado na reunión semanal do Executivo autonómico. Mediante este acordo, autorízase o envío dos pacientes beneficiados, protocolos e asistencia sanitaria, así como o acceso ás historias clínicas ao Servizo Galego de Saúde.

O marco territorial de colaboración compono a área sanitaria de Lugo, A Mariña e Monforte de Lemos, e as áreas sanitarias asturianas con cabeceira en Jarrio e Cangas del Narcea. O ámbito de actuación inicial beneficia aos veciños da parroquia asturiana dos Coutos, con ao redor de 50 habitantes. No caso da atención primaria, inclúese a atención sanitaria programada, así como a demanda no centro de saúde asignado, e a atención continuada.

A poboación de referencia será derivada ao centro de saúde e á zona especial de urxencias de Navia de Suarna, situada a 26 minutos en coche fronte aos 45 minutos do seu centro de referencia, en San Antolín de Ibias (Asturias). O centro de saúde de Navia conta no seu persoal cunha médica, unha enfermeira e persoal administrativo. O número de cartóns sanitarios que atenden é de 872, dos que 837 son adultos, mellorando notablemente as recomendacións das sociedades científicas que sinalan que as cotas non superen os 1.500 cartóns.

A atención hospitalaria será prestada polo Servizo Galego de Saúde a través do Hospital Universitario Lucus Augusti (HULA) e incluirá a asistencia sanitaria urxente, consultas externas, hospital de día ou internamento cando sexa necesario. Neste caso, o tempo de viaxe verase reducido de 1 hora e 45 minutos a preto de 1 hora. Rueda explicou que, aínda que inicialmente non se contempla unha “contrapartida”, poderíase estudar a conveniencia, chegado o caso, de que veciños galegos puidesen facer uso de centros de saúde de localidades asturias, como ocorre, por exemplo, noutras zonas limítrofes con Castela e León.

TRANSPORTE DE PACIENTES

Con carácter xeral, todos os traslados interhospitalarios e o traslado dos pacientes derivados para ser atendidos na comunidade limítrofe serán por conta do Sergas, establecéndose mecanismos de colaboración entre as centrais coordinadoras de urxencias e emerxencias. Nos casos de urxencia vital ou tempo dependente, os servizos de emerxencias de ambos os servizos de saúde poderán solicitar a mobilización dos medios dispoñibles para unha correcta cobertura da situación.

En canto ás prestacións sanitarias facilitadas polo convenio, os gastos serán compensados polo Fondo de Cohesión Sanitaria ou o Fondo de Garantía Asistencial (Foga). Ademais, o Servizo de Saúde do Principado de Asturias (Sespa) comprométese a compensar ao Sergas polos gastos incorridos a causa do desprazamento dos seus profesionais sanitarios ou por necesidades de reforzo de persoal no ámbito territorial de colaboración.

GALICIA ATENDE PACIENTES DE LEÓN E PORTUGAL

Na súa intervención, o presidente galego lembrou que a Xunta mantén un convenio similar con Castela e León, polo que o Sergas atende no distrito de Valdeorras a pacientes de municipios pertencentes á comarca do Bierzo e, en Verín, pacientes de Alta Sanabria. De forma mutua, pacientes do municipio ourensán de Rubiá, concretamente da parroquia de Quereño, son atendidos pola sanidade de Castela e León (Sacyl) no centro de saúde Ponte Domínguez Flórez (provincia de León) se así o desexan. Igualmente, está prevista a derivación de urxencias ao Hospital do Bierzo (en Ponferrada).

Ademais, Galicia tamén presta asistencia sanitaria urxente nas zonas limítrofes con Portugal a través dun acordo subscrito entre a Consellería de Sanidade e o Instituto Nacional de Emerxencia Médica do Goberno portugués. Este acordo establece o marco normativo para desenvolver, a través do 061, a colaboración sanitaria nas emerxencias entre Galicia e o Norte de Portugal. O convenio de colaboración con Asturias autorizado este luns polo Consello da Xunta ten unha vixencia de catro anos e é susceptible de ser prorrogado.

HOSPITAL MONTECELO

Noutra orde de asuntos, Rueda informou de que o seu Goberno abordou este luns a primeira fase do plan de investimentos do Hospital Novo Montecelo de Pontevedra, unha actuación na que está previsto investir 30 millóns de euros e que posibilitará avanzar na instalación dos equipos co obxectivo de comezar a tratar os primeiros pacientes a finais de 2025. Así, o Complexo Hospitalario Universitario de Pontevedra será o primeiro de Galicia en contar coa totalidade dos seus quirófanos dixitais, o que posibilitará a súa integración completa cos sistemas operativos do Sergas.

Esta mellora, á que a Xunta destinará unha partida de 1.480.000 euros, permitirá a interconexión dos diferentes equipos xeradores de imaxe no quirófano, a transferencia de imaxe e son fóra do propio quirófano, ademais da integración dos datos nos sistemas corporativos do Sergas (como a historia clínica electrónica Ianus). Outro dos equipos previstos será o de imaxe intraoperatoria para mellorar a obtención de imaxes na área cirúrxica ou contornas minimamente invasivas. O seu orzamento estimado é de 3,1 millóns de euros. Dentro da área de cirurxía, tamén se prevén 2,6 millóns de euros para dotar o Novo Montecelo dunha central de esterilización para o procesamiento do seu instrumental.

PARTIDA MÁIS IMPORTANE

A partida máis importante que inclúe a fase inicial do plan de dotación son os máis de 5 millóns de euros que se destinarán á adquisición de equipos de ecografía con destino ao conxunto de servizos do novo hospital. Así mesmo, os novos servizos de Radioterapia e Medicina Nuclear contan cunha consignación de 1,5 millóns de euros. Ademais, o Goberno galego licitará por 125.000 euros a compra de mobiliario clínico e equipamento, con destino a estas dúas unidades. Segundo a Xunta dotar das mesmas ao Hospital Público de Pontevedra evitará o desprazamento a Vigo de máis de 500 pacientes ao ano.

Entre as partidas reservadas para equipar o Novo Montecelo destaca tamén o investimento que se realizará para adquirir equipos de alta tecnoloxía, cuxo importe ascenderá, segundo as previsións, a 1.110.000 euros. En concreto, adquiriranse para a realización de estudos xerais de cabeza e colon, de tórax, abdome e musculoesqueléticos, estudos neurolóxicos e cardiolóxicos. En concreto, comprarase un tomógrafo computarizado para o servizo de Urxencias (659.000 euros) e investiranse 451.000 euros en dúas salas de radioloxía dixital sincronizada.