A Plataforma Ulloa Viva reuniuse co secretario xeral do PSdeG, José Ramón Gómez Besteiro, para trasladarlle a petición de que o Estado denegue financiar o proxecto de Altri en Palas de Rei.

A este encontro acudiron Marta Gontá, Zeltia Laya e Mónica Cea por parte de Ulloa Viva, quen demandaron que “traballe para que o Goberno do Estado diga non ao financiamento que Altri solicita de fondos europeos”.

Segundo expón a plataforma nun comunicado, Besteiro comunicoulles que ao PSdeG “non lle gusta o proxecto” e “non lle ven cabida para recibir fondos europeos”.

Ulloa Viva trasladou ao líder socialista galego “o malestar e preocupación” dos veciños das comarcas da Ulloa, Deza, Terras de Melide e Arzúa polos “efectos prexudiciais para o futuro”.