A Garda Civil detivo a un home, unha das persoas migrantes que acolle a localidade lucense de Becerreá, como presunto autor de agresións sexuais a dúas das traballadoras da organización humanitaria que lles presta asistencia.
Segundo fontes coñecedoras do suceso consultadas por Europa Press, a detención produciuse este venres tras as denuncias interpostas polas vítimas. Na mañá deste sábado foi posto a disposición do xulgado de Becerreá.
A ONG, segundo fontes da Delegación de Goberno en Galicia consultadas por Europa Press, á marxe da decisión do xuíz, abriu un expediente a esta persoa e procederase á expulsión do seu lugar de acollida.
POSTA EN LIBERDADE
Un Xulgado de Becerreá decretou a posta en liberdade para un home, das persoas migrantes que acolle a localidade, investigado por dous delitos de acoso e un de agresión sen violencia, a dúas das traballadoras da organización humanitaria que lles presta asistencia.
Segundo informaron fontes xudiciais, respecto dunha denunciante o home está investigado por un delito de agresión sexual e outro de acoso. Con respecto á outra muller, está investigado como presunto autor dun delito de acoso. O home, que foi detido este venres, ten prohibido aproximarse ás dúas mulleres.
ASISTENCIA
Pola súa banda, fontes da consellería de Política Social, detallaron a Europa Press que a Xunta xa puxo en marcha o protocolo de psicólogos para que preste o servizo necesario ás dúas mulleres.
Ademais, a Administración galega contactará con ambas as traballadoras que, de acordo coa lei de violencia de xénero, son vítimas de violencia de xénero e ofreceranlle as axudas e programas destinados a iso, detallaron as mesmas fontes.
