Un home foi identificado en Lugo por manexo de drons sen autorización e sen licenza, segundo informa a Policía Local no seu parte de incidencias. Este sábado, día 31, ás 19.30 horas varios cidadáns informaron ao 092 sobre o voo dun dron, a pouca altura na zona de Tolda, próxima ao Río Miño, e sobre a presenza dun home, entre os paseos do Miño e do Intre, “co que parece ser o mando de control do citado dron”.
Os axentes contactaron con varias testemuñas e afectados polo voo do dron e localizaron ao individuo que manexaba o aparello, comprobando que tiña outro máis e que tamén facía uso dunhas lentes de realidade virtual. Os policías levantaron acta polo sucedido por observar varias infraccións, a cal será remitida á Axencia Estatal de Seguridade Aérea (AESA), que podería sancionalas en función da catalogación de cada unha delas. Noutra orde de cousas, a fin de semana deuse auxilio a varias persoas. Así, foi atendida unha muller sangrando polas bonecas e outra pola boca debido a unha “caída ocasional” e ambas as trasladadas a un centro sanitario; e un veciño necesitou axuda tras caer da cama e “ser incapaz de incorporarse”.
DESACORDO NUN ALUGUEIRO
A Policía tamén tivo que mediar nun desacordo por unha habitación. A propietaria quería desaloxar á inquilina, quen se negaba a abandonar a estancia. Todo iso debido a que “non se poñen de acordo na cantidade de diñeiro abonada” polo alugueiro da mesma. Finalmente, o asunto resolveuse sen interpoñer ningunha denuncia tras chegar “aparentemente a un acordo”.
Así mesmo, os axentes atenderon a tres mulleres que dicían sentirse “intimidadas” por un home nunha verbena, o cal foi identificado antes de ausentarse do lugar; a unha veciña por molestias por mor do volume da música procedente doutro inmoble; e tiveron que desprazarse a dous domicilios nos que a celebración de festas ocasionaban “molestias” aos veciños próximos. Os efectivos denunciaron, ademais, a un home por cometer faltas de respecto contra axentes que se atopaban corrixindo infraccións de tráfico.
