Unha persoa faleceu e outra resultou ferida grave tras producirse unha colisión entre un turismo e un camión na estrada LU-530, no termo municipal de Lugo. O sinistro produciuse sobre as 18.00 horas deste martes entre o quilómetro 11 e 12 da LU-530, ao seu paso pola parroquia lucense de Gondar.

Foron varios os particulares que alertaron ao 112 Galicia deste accidente, indicando que un camión e un coche chocaran frontalmente. Segundo a información recollida polos operadores do 112, o camión transportaba madeira, pero no momento do accidente non levaba carga. Pola súa banda, no coche viaxaban dúas persoas que necesitaban asistencia sanitaria urxente.

Con esta información, solicitaron a intervención do Servizo de Urxencias Sanitarias de Galicia-061 e dos Bombeiros de Lugo, así como á Garda Civil de Tráfico e da Policía Local. Xa no lugar, o persoal sanitario non puido facer nada por salvar a vida da vítima. Ademais, a outra persoa ocupante do turismo foi trasladada polos servizos sanitarios.