O loteiro lucense detido o martes pola súa presunta implicación no atraco perpetrado contra a súa propia administración de lotaría o pasado 4 de xaneiro foi posto en liberdade con cargos este xoves investigado polos presuntos delitos de simulación de delito, tentativa de estafa e apropiación indebida.
O dono da administración de lotaría foi trasladado pola Policía Nacional ás dependencias do Xulgado número 2 de Lugo, que instrúe o caso, tras pasar a noite do mércores nos calabozos da comisaría. Vestido cun plumífero de cor azul, encapuchado, coa cabeza gacha, as mans esposadas e escoltado por un axente da Policía Nacional, o loteiro realizou o seu ingreso no edificio dos Xulgados ao fío das 13,30 horas.
Alí, no mesmo Xulgado de Instrución que hai dous meses arquivou a causa na súa contra por falta de indicios sólidos capaces de acreditar a súa implicación no atraco, o home acolleuse ao seu dereito a non declarar, quedando en situación de liberdade sen prexuízo dunha ulterior cualificación conforme avance a instrución do caso.
Algunhas horas antes do traslado do loteiro a sede xudicial –onde non se celebrou comparecencia de prisión– os outros dous detidos polo asalto –unha muller e un home considerados os presuntos autores materiais do roubo– foron interrogados na Comunidade de Madrid. A muller quedou en liberdade en sede policial tras prestar declaración mentres que o home compartiu o seu testemuño desde prisión, onde cumpre condena por outro delito.
SEIS MESES DE PESCUDAS POLICIAIS
Transcorreron máis de seis meses desde o asalto ocorrido na administración de lotaría número 10 de rúa Lamas de Prado da capital lucense. Un roubo a punta de pistola, ás 8,30 horas da mañá, perpetrado presuntamente por dous encapuchados de nacionalidade colombiana –segundo o testemuño ofrecido entón aos medios polo propio loteiro– que se saldou coa subtracción dunha suma de diñeiro “próxima aos 400.000 euros” aloxados en dúas caixas fortes.
Un atraco cometido en “a semana de maior recadación” de todo o ano –lamentaba o loteiro naquelas mesmas declaracións– que fixo desconfiar aos investigadores do caso desde un primeiro momento, pasando en cuestión de semanas o dono da administración de denunciante a investigado pola súa presunta participación nos feitos.
No mes de abril, a maxistrada do Xulgado de Instrución número 2 de Lugo, o mesmo que este xoves acordou a súa posta en liberdade con cargos, decretou o sobresemento das actuacións na súa contra ao “non atopar motivos suficientes para imputar a determinada ou determinadas persoas como autoras, cómplices ou encubridoras” do presunto delito.
As pescudas policiais, con todo, continuaron e o visionado das gravacións dunha cámara de seguridade dunha lavandaría situada xusto enfronte da administración, puxo á policía tras a pista dos supostos autores materiais, que sinalarían nas declaracións prestadas tras a súa detención ao loteiro como o autor intelectual do atraco. Seis meses despois do asalto á administración de lotaría, a mañá do 4 de xaneiro e en véspera de Reis, o caso continúa aberto.
