A viceportavoz parlamentaria do BNG e deputada pola provincia de Lugo, Olalla Rodil, reclamou á Xunta que dote ao PAC de Lugo do persoal suficiente. Nun comunicado, a formación nacionalista sinala que esta fin de semana no PAC de Lugo situado no CIS da Residencia sufríronse longas esperas e colas pola falta de médicos. Ademais, sinala que especialmente complicada foi a situación o xoves e o luns, cando só houbo dous facultativos cando o centro ten asignados tres equipos.

“Non pode ser que seis meses despois de trasladar o PAC ao CIS da Residencia a situación sexa esta”, denunciou a deputada, que sostivo que a Consellería de Sanidade ten que “dotar de medios suficientes ao PAC para que non se repitan situacións como a da semana pasada”, con xente tendo que acudir ao hospital por falta de medios neste centro. “Desde o BNG pedímoslle á Xunta que dote dun cuarto equipo ao PAC de Lugo, como pide o persoal sanitario, para garantir o correcto funcionamento do mesmo e, sobre todo, a máxima calidade na atención sanitaria da poboación”, explicou.