O presidente da Deputación de Lugo, José Tomé, supervisou en Xermade as diferentes obras nas que a institución provincial investiu máis de 1,5 millóns de euros co obxectivo de dotar de máis e mellores servizos aos veciños.

Así o destacou a institución provincial nun comunicado, no que sinala que o mandatario provincial comprobou o resultado dos traballos de acondicionamento da estrada que conecta Momán e As Pontes, na LU-P-2204, renovada na súa totalidade e a creación dun parque con xogos infantís na parroquia de Roupar.

O presidente destacou que esta colaboración económica con Xermade é unha mostra máis do compromiso da Deputación de Lugo con este municipio e cos seus veciños e veciñas. “Sempre digo, a Deputación ten que ser o concello dos concellos, e actuar así é especialmente relevante cando falamos de concellos do rural, que teñen o mesmo dereito a ter servizos públicos de calidade”, sinalou.

Así mesmo, indicou que estas dúas accións favorecen directamente a calidade de vida da xente, porque teñen que ver coa mobilidade e co benestar.