A Confederación Intersindical Galega (CIG) denunciou atrasos no pago das nóminas de empregados de ambulancias da provincia de Lugo. En concreto, a organización sindical informou nun comunicado que a empresa Lucus Loxística, con sede en Becerreá e que leva a xestión das bases de ambulancias para o servizo de transporte urxente 061 de Navia de Suarna, Palas de Rei, Guitiriz, Sarria, Becerreá e Pedrafita do Cebreiro, non materializou o pago dos soldos do mes de marzo.
Isto, segundo cifras da CIG (que non ten representación entre o persoal), afecta a uns 50 empregados, o cal é “preocupante” debido a que supón un “incumprimento contractual” co persoal. Por todo iso, instou á Administración a pór interese no asunto, debido a que pode ser un “claro síntoma de precaridade laboral, que pode repercutir no servizo”,
Precisamente a semana pasada, a CIG tamén denunciou unha situación similar vivida polo persoal da empresa Ambulancias do Atlántico, actual concesionaria do 061 en Vigo, Cangas e Moaña e que tamén presta o servizo de transporte sanitario dos hospitais para toda a área da cidade olívica, que llevarían un ano acumulando atrasos no abono das súas nóminas.
