A asociación Lugo Monumental, cando se soubo que o Obradoiro non facilitaba máis que unhas poucas entradas aos siareiros do Breogán, pensou nunha iniciativa. Quería poñer unha pantalla xigante na Plaza de Santa María para vivir ese encontro tan especial coa afición lucense.

Segundo explican, o financiamento da pantalla estaba asegurado pola colaboración dos socios e non prevían ter problema de autorización por parte das autoridades municipais. Foi Movistar+ quen non permitiu esta iniciativa ao negarse a ceder os dereitos de emisión dos contidos.

Cando contactaron coa entidade, a resposta foi que a emisión nun lugar público de contidos que “son exclusivos dos canais de Movistar+” iría en contra dos intereses “dos seus clientes e abonados de locais públicos”. Desde Lugo Monumental lamentan enormemente esta circunstancia, que non poden cambiar.

A asociación lembra que noutras ocasións se atoparon cun problema similar á hora de querer pór a pantalla por partidos do CD Lugo ou outros equipos locais, xa que os dereitos de retransmisión soen ser privados e non os ceden, nin dan a opción de contratalos. A última vez que se puxo foi pola final da Champions e debeuse a que se retransmitíu por Televisión Española.