A Administración de Lotaría número 10 de Lugo, situada na rúa Lamas de Prado da capital lucense, que este xoves sufriu un atraco, repartiu no sorteo do Neno dez décimos do terceiro premio, o que supón un total de 250.000 euros.
O número 57.033 deu “un pouco de alivio” a Guillermo Rodríguez, responsable deste establecemento quen, aínda “emocionado” e “intranquilo” polo sucedido esta semana, recoñece que este premio supón “un granito de alegría dentro destes dous días horrorosos”.
Ademais, Rodríguez detallou en declaracións aos medios que os dez décimos foron vendidos todos en portelo hai xa varias semanas, mesmo antes do sorteo de Nadal, polo que cre que os premiados son xente do barrio.
FEITOS
Dous encapuchados asaltaron a punta de pistola á primeira hora da mañá do xoves esta administración da capital lucense, da que levaron un botín, segundo a estimación do propio loteiro, de “preto de 400.000 euros”.
Os feitos tiveron lugar ás 08,30 horas, cando o propietario se dispuña a abrir o seu negocio. Nese momento, dúas persoas co rostro e as mans cubertas irromperon no local encañonárono e obrigándolle a entregar o diñeiro das dúas caixas fortes.
Tras o asalto, que durou “un oito minutos” xa que as caixas de seguridade contan cun mecanismo de retardo que non permite acceder inmediatamente ao seu contido, o administrador alertou á policía, que non tardou en personarse no lugar dos feitos.
