A alcaldesa de Lugo, Lara Méndez, considera que a esquerda “debe axuntar esforzos”, tamén na súa provincia, porque “cando hai moita división, se fracciona moitísimo o voto e hai moitas eleccións lexítimas que despois non alcanzan representación” e por tanto quedan como un voto “inútil”.
Así se pronunciou, en declaracións aos xornalistas, en concreto á pregunta sobre a posibilidade de que se aglutine o voto en torno ao PSOE na provincia de Lugo se Sumar aceptase non presentarse tanto nesta provincia como na de Ourense.
“Estamos nun momento en que nos xogamos moitísimo”, respondeu, en alusión aos últimos 15 anos e a que “Galicia non avanzou en ningún dos ámbitos”. Agora, valorou, “Galicia ten que tomar unha decisión de avanzar, buscar progreso ou quedar estancada”. “Canto máis se divida o voto da esquerda, máis opción terá a dereita de perpetuarse no Goberno“, advertiu.
BESTEIRO
Cuestionada sobre o feito de que o candidato do PSdeG á Presidencia da Xunta, José Ramón Besteiro, será o presidente da comisión de transportes no Congreso, Méndez mostrouse “segura” e “convencida” de que isto “significará un impulso importante para as infraestruturas galegas”.
“Coñezo ben a súa figura, estiven oito anos traballando ao seu lado e sei do seu bo facer e a xestión que fixo”, sinalou a rexedora luguesa.
“EN SERIO”
Por último, indicou que na súa opinión o PSOE “tomouse sempre en serio” as eleccións en Galicia, e apelou ao “denominador común” no partido, “máis aló” da “autonomía e independencia” do PSdeG.
