O sindicato CIG emitiu este xoves un comunicado no que informa de que o Tribunal do Social 2 de Lugo advertiu a Carrefour Lugo da imposición dunha multa diaria de 300 euros se “continúa incumprindo a sentenza que recoñeceu o dereito dun traballador a que se lle adapte a xornada laboral para poder coidar do seu fillo”.
A resolución xudicial emitida en febreiro pasado, apunta o sindicato, determinou que o traballador debería prestar servizo de luns a sábado en horario de 06,00 a 13,00 horas, “condenando a Carrefour a modificarlle a xornada nestes termos a fin de que puidese conciliar a vida laboral e familiar, estendendo ademais este dereito ata agosto de 2024”.
Con todo, engaden, a empresa “decidiu modificarlle o horario de forma discrecional”, impedíndolle deste xeito “poder recoller ao seu fillo no colexio”.
“Esta práctica de modificación horaria foi sostida no tempo a pesar dos requirimentos trasladados, das peticións pola indefensión de ter unha sentenza que a empresa se negaba a cumprir e polo feito de non poder conciliar nos termos que o traballador precisaba, ao coincidir o horario de fin de prestación de servizo co horario de saída do menor do colexio”.
A sección sindical da CIG denunciou “a práctica habitual de Centros Comerciais Carrefour Lugo de non acatar as sentenzas”, algo que considera unha “auténtica burla por parte desta multinacional cara ao sistema xurídico”.
