A Policía Nacional e os Mossos d’Esquadra puxeron en marcha este martes un dispositivo contra unha organización criminal vinculada ao neonazismo, realizando entradas e rexistros en diferentes municipios de Cataluña, Madrid, Lugo, Toledo e Málaga.
A operación contra unha organización criminal de ideoloxía neonazi dentro dun dispositivo conxunto posto en marcha pola Policía Nacional e os Mossos d’Esquadra levou aos axentes a mañá deste martes á aldea de Ferroños, no municipio lucense de Sober, onde foi rexistrada a vivenda onde residía un dos sospeitosos.
Segundo puido saber Europa Press, o home, veciño do Concello de Sober, vivía de aluguer desde facía algún tempo nunha casa da aldea de Ferroños, pertencente á parroquia de San Martiño de Anllo, na comarca de Terra de Lemos, onde este martes, cara ás 8.00 horas, tivo lugar o rexistro do domicilio dirixido por catro unidades da Policía Nacional.
“Non coñecemos aínda o alcance da operación, pero estamos sorprendidos de que nun concello pequeno como Sober pasen este tipo de cousas”, recoñeceu, en declaracións a Europa Press, o alcalde do municipio, Luís Fernández Guitián.
ORGANIZACIÓN NAZI
O dispositivo céntrase sobre ‘Combat 18’, “organización criminal vinculada ao nacional socialismo e ao supremacismo branco”, segundo comunicaron tanto Policía como Mossos minutos antes das 06.00 horas a través da rede social X.
Prevense entradas e rexistros en varios municipios cataláns –Barcelona, Navarcles, Sant Boi de Llobregat, Sentmenat (Barcelona), Lloret de Mar (Xirona) e Mollerussa (Lleida)–, así como en Arganda del Rey (Madrid), Talavera de la Reina (Toledo), Lugo e Málaga.
En Cataluña, os Mossos d’Esquadra activaron efectivos da Comisaría Xeral de Información; axentes da Brigada Móbil (Brimo), da área Rexional de Recursos Operativos (Arro), do Grupo Especial de Intervención (GEI) e a Unidade Canina. Ademais, fontes policiais informaron que a investigación está tutelada polo xulgado de instrución 3 de Manresa (Barcelona).
