A vicepresidenta segunda da Xunta, Ángeles Vázquez, e o alcalde de Baralla, Miguel González, reuníronse recentemente para avaliar o proxecto de rehabilitación da casa cuartel do municipio para destinala a vivendas en réxime de aluguer social.
Neste encontro, tal e como informa o Goberno galego, a tamén conselleira de Medio Ambiente, Territorio e Vivenda explicou ao rexedor a posibilidade de que esta obra se financie ao amparo do fondo de cooperación para conservación do patrimonio en municipios de menos de 50.000 habitantes. O prazo de solicitudes acabará o 31 de outubro.
A maiores, como Baralla ten menos de 20.000 veciños, tamén podería optar a axudas para a rehabilitación de edificios e vivendas que sexan de titularidade municipal. O apoio da Xunta alcanzará ata o 95 por cento do orzamento protexido das obras; iso si, ata un máximo de 50.000 euros.
