O pleno da Deputación de Lugo esixiu este martes á Xunta que cubra a xubilación “inminente” dunha vintena de médicos nos municipios de Láncara, Sober, Pantón, O Páramo, Guitiriz, Castro de Rei, Samos, Monterroso, Pedrafita do Cebreiro, As Nogais, O Incio, Portomarín, Antas de Ulla, A Pontenova e Begonte.
A iniciativa, que contou co apoio do BNG e o voto en contra do PP, foi defendida pola portavoz socialista Pilar García Porto, quen, tal e como informou a Deputación nun comunicado, asegurou que, “por desgraza”, a situación da sanidade pública na provincia é un “exemplo da mala xestión” do Sergas, que “pagan os lucenses coa deterioración dos servizos públicos”.
“Custa entender como en pleno século XXI un goberno que presume de xestión poida deixar sen atención médica a unha parte tan importante do territorio”, sostivo a socialista, que denunciou o “desprezo do PP cara á poboación do rural”.
Así mesmo, o texto aprobado tamén reclama ao Goberno galego que restitúa os cadros de persoal previstos para cada centro de saúde, recuperando as prazas desaparecidas polas “políticas de recortes do PP”, que “estableza modelos de carreira profesional que aseguren a carga de traballo adecuada aos profesionais, eliminando as cotas excesivas de pacientes, a non cobertura de baixas ou vacacións”.
MAIOR PARTICIPACIÓN DOS CONCELLOS
A institución provincial, tamén ha raíz doutra iniciativa dos socialistas apoiada polo Bloque e rexeitada polo PP, reclamou á Administración autonómica que modifique o modelo de tributación do canon eólico, pasando de fixalo por potencia en lugar de por muíño; que defina a participación dos concellos costeiros nos beneficios da eólica mariña; e que estableza que a recadación íntegra do actual canon eólico e do futuro canon da eólica mariña destínese a melloras nos concellos e nas comunidades locais afectadas pola instalación dos parques.
“Os concellos acollen o impacto das obras e neles asíntanse as infraestruturas que fan posible o aproveitamento das enerxías limpas”, explicou García Porto, á vez que denunciou que precisamente as entidades locais “seguen sendo as grandes esquecidas no desenvolvemento do sector”, recibindo “un mal pago da Xunta”.
CENTRO DE RECRÍA GRANXA GAYOSO
A corporación tamén aprobou a revisión das tarifas do Centro de Recría que a Deputación ten en marcha na Granxa Gayoso Castro, un paso que a institución provincial cualificou de “fundamental” para a viabilidade deste servizo público, unha vez que está ao 100% da súa capacidade e tendo en conta a subida dos prezos dos alimentos e dos materiais para o coidado animal debido ás consecuencias económicas da invasión de Ucraína e da seca.
Esta medida, conforme sinalou a institución provincial, suporá para os gandeiros da provincia 0,78 céntimos máis ao día por animal, ata os 3,33 euros.
Respecto diso, noutro comunicado remitido aos medios, o PP de Lugo sostivo que, co seu voto a favor, tanto socialistas como nacionalistas acordaron que os gandeiros que teñen animais neste centro público paguen 3,33 euros por animal/día, unha subida do 30%, xa que ata agora pagaban “2,55 euros”.
APROBACIÓN DA CONTA XERAL
Ademais, o pleno tamén aprobou a conta xeral da institución provincial correspondente ao ano 2022, “cumprindo así cos prazos legalmente establecidos”. A deputada de Economía, Mayra García Bermúdez, destacou que o gasto comprometido alcanzou no ano 2022 un 86,3%, consolidando á Deputación de Lugo “como unha das administracións locais de España con maior grao de execución orzamentaria”.
Sobre este punto, o deputado provincial do PP Antonio Ameijide considerou necesario que os datos da conta xeral “fagan reflexionar” ao goberno provincial para conseguir un “mellor funcionamento” da Deputación de Lugo e unha mellor repartición dos recursos, tanto humanos como materiais para dar un “trato igualitario a todos os concellos”.
Por último, na sesión plenaria celebrada este martes acordouse por unanimidade a adhesión da Deputación ao servizo de asistencia técnica e dinamización para a participación e xestión dos fondos europeos do Plan de Recuperación, Transformación e Resilencia por parte de Tragsatec, a empresa pública de tecnoloxías que forma parte do grupo Tragsa.
