A Sala do Civil e Penal do Tribunal Superior de Xustiza de Galicia (TSXG) absolveu, por non acreditarse que era coñecedor da idade do menor, a un condenado pola Audiencia Provincial de Lugo a sete anos de cárcere por agredir sexualmente a un mozo de 14 anos co que contactou a través da aplicación de citas Grindr.
O alto tribunal galego considera probado que, en febreiro de 2022, o procesado, que tiña 41 anos, concertou unha cita “para manter un encontro de carácter sexual” coa vítima, de 14 anos, tras intercambiar “mensaxes de índole sexual”.
A Sala do Civil e Penal asegura que mantivo relacións sexuais co menor no interior dun vehículo, “todo iso na crenza de que non era menor, nos termos da acusación”.
Discrepa, por tanto, da sala de instancia, pois afirma que “non pode entenderse acreditado que o acusado tivese coñecemento de que a persoa coa que contacta fose menor de 16 anos”.
“Chégase a esta conclusión tras unha detida deliberación sobre o suposto axuizado, tendo en conta que é o menor o que se fai pasar por maior de idade ao subscribirse a unha páxina de contactos que só admite a maiores”, explica o TSXG, á vez que incide en que esta circunstancia, de inicio, “provoca a presunción no acusado de que a persoa coa que se cita non é menor”.
A partir deste dato, afirma que hai que exporse “sobre o que lle era esixible ou puido ou debeu exporse o acusado unha vez que o menor entra no seu vehículo”. Os maxistrados explican que, no presente caso, ao acusado “nada o podía facer sospeitar, á vista das conversacións de WhatsApp mantidas, a ausencia de coñecemento previo de ningún tipo, a práctica ausencia de diálogo dentro do vehículo e o moi breve espazo de tempo que durou o encontro (uns 11 minutos)” de que era menor de 16 anos.
“Ademais, o mozo levaba posta unha máscara, que non se chegou a quitar completamente en ningún momento, segundo recoñece, do mesmo xeito que recoñece non dicirlle a idade, sendo igualmente significativo que non quixese denunciar nin sentise enganado, segundo as súas propias manifestacións”, subliña o TSXG, á vez que indica que, ademais, “a estatura e corpulencia do menor era superior á do acusado, sendo difícil distinguir a idade nesa franxa, tendo en conta as diferenzas de aparencia física entre individuos”.
O TSXG explica que se trata dun delito doloso, que non admite comisión imprudente, o que conduce ao ditado dun pronunciamento absolutorio. A sala, por tanto, apreciou que a sentenza da Audiencia Provincial de Lugo vulnerou a presunción de inocencia do recorrente. O fallo non é firme, pois se pode recorrer ante o Tribunal Supremo.
