A maxistrada do Xulgado de Instrución nº2 de Mondoñedo decretou o segredo de sumario no caso da desaparición no municipio lucense de Abadín de Enrique Bolívar Díaz Pardo, do que non se teñen noticias desde o pasado 3 de setembro.
Segundo confirmaron fontes da investigación a Europa Press, a titular deste xulgado mindoniense autorizou á Policía Xudicial da Garda Civil a práctica dunha serie de dilixencias e declarou o segredo das actuacións. Trátase dun home de máis de 80 anos de idade, de tez clara, ollos azuis e lentes que, segundo apuntaban as primeiras informacións, perdeuse na parroquia de Quende.
Nun primeiro momento, unha trintena de persoas entre persoal das forzas de seguridade e voluntarios, así como veciños, conformaban o dispositivo, pero agora que a investigación trata de esclarecer se habería terceiras persoas implicadas, o operativo de voluntarios concluíu tras dúas semanas “buscando a fondo” polos lugares aos que se cría que podería chegar Enrique Bolívar.
Ademais, fontes próximas ao caso consultadas por Europa Press recoñeceron que non se descarta ningunha hipótese e cren que o achado dun coche calcinado en Ribadeo a mesma noite da desaparición do octoxenario, a media hora do lugar onde supostamente se lle perdeu a pista, pode ter relación con este suceso. “Dános a entender que pode ter que ver unha cousa coa outra”, afirman estas mesmas fontes.
Por outra banda, Roberto, o coordinador do operativo de procura, mostrou a súa preocupación por este suceso, xa que se trata de “unha aldea tranquila” na que “nunca pasou ningún caso parecido”. Así, apuntou que desde entón a xente ten medo e xa non sae soa de casa “ao non saber que puido pasar”. “Pensar poderanse pensar varias cousas, pero ata que nos digan algo non podemos saber nada”, sinalou en declaracións a Europa Press.
