Axentes da Policía Local de Lugo tramitaron denuncia contra un home e contra un supermercado da cidade por infracción da lei de residuos e chan contaminado de Galicia, en relación cunha vertedura de chatarra nun poboado chabolista próximo ao polígono industrial do Ceao.
Os feitos ocorreron o pasado xoves, cando a última hora da tarde unha patrulla observou na rúa Xosé Novo Freire a un camión que ocupaba parte da zona peonil, obstaculizando o paso de viandantes.
Ao identificar os ocupantes do camión para denunciar a infracción, estes explicaron que estaban a cargar uns paneis de grandes dimensións e diverso material eléctrico procedentes das antigas neveiras dun supermercado, e que o establecemento lles entregou voluntariamente.
Así mesmo, sinalaron aos policías que a súa intención era trasladar todo o material a un punto limpo, para darlle o tratamento legalmente procedente. A Policía Local realizou unha vixilancia e seguimento do vehículo e comprobou que, tras finalizar a carga do material, dirixiuse a un poboado chabolista próximo ao polígono do Ceao. Os ocupantes do camión descargaron a chatarra no chan próximo ás vivendas.
Por iso, os axentes confeccionaron actas de denuncia contra o establecemento comercial por entregar os residuos a persoas non autorizadas para o seu traslado e tratamento; ao condutor do camión pola carga e traslado do material sen autorización, e polo depósito dos residuos nun lugar público non permitido.
Nesta actuación foi necesaria a participación de tres indicativos policiais, debido á hostilidade mostrada por parte dos ocupantes do camión contra os axentes.
