A Deputación de Lugo censurou o “deplorable comportamento” do presidente da Real Federación Española de Fútbol (RFEF), Luís Rubiales, por “tentar culpabilizar á vítima” e “atacar e desprezar ao feminismo” durante a súa comparecencia deste venres ante a asemblea do órgano que rexe o fútbol español, onde manifestou a súa vontade de permanecer no cargo a pesar das peticións de dimisión polo bico non consentido á xogadora Jennifer Fermoso na entrega de premios do Mundial feminino.
Nun comunicado, o goberno provincial que encabeza o socialista José Tomé reclama a dimisión de Rubiales e manifesta que confía en que se adopten “as medidas máis contudentes” contra feitos que apelan a “erradicar de todos os ámbitos” da sociedade para “seguir avanzando cara á igualdade real e efectiva das mulleres”.
Para a deputación, as manifestacións feitas ante a asemblea da RFEF de Rubiales “agravan aínda máis o deplorable comportamento que vén demostrando desde o pasado domingo, machista e prepotente, que resulta inaceptable e incompatible coa representación que ostenta”.
Así pois, instou ao Goberno central a que empregue os resortes legais “ao seu alcance” para inhabilitar ao presidente do máximo organismo do fútbol español, quen “confunde o perdón e a desculpa coa prepotencia e co machismo máis rancio, culpando aos demais do seu mal comportamento, que son socialmente inaceptables, e facendo ofertas con diñeiro público da Federación para comprar vontades”.
