A Vicepresidencia Segunda e Consellería de Medio Ambiente, Territorio e Vivenda formulou o informe de impacto ambiental (IIA) correspondente ao proxecto de terminal de autobuses integrada na estación intermodal de Lugo, unha resolución, informa, coa que se dá por concluída a súa tramitación desde o punto de vista ambiental.

O Diario Oficial de Galicia (DOG) publica este mércores o anuncio polo que se fai público devandito informe. Despois de realizar unha avaliación ambiental simplificada da iniciativa, o organismoambiental conclúe que non son previsibles efectos significativos sobre o medio ambiente pola construción da nova terminal de autobuses.

“E, por tanto, tampouco se considera necesario sometela a avaliación de impacto ambiental común”, engade. Deste xeito, serán agora o órgano promotor do proxecto, a Consellería de Infraestruturas e Mobilidade, a través da Dirección Xeral de Mobilidade e a Dirección Xeral de Ordenación do Territorio e Urbanismo, os que deberán continuar coa tramitación necesaria.

A estación intermodal de Lugo é un proxecto conxunto entre a Xunta, Adif e o Concello de Lugo que suporá un investimento global de 49,2 millóns.