“Preparados, listos, xa!” e foto co móbil. Así exerceu de anfitrioa a presidenta provincial do PP e portavoz popular no Concello de Lugo, Elena Candia, na segunda visita do ex presidente do Goberno Mariano Rajoy a Galicia nesta campaña, despois de participar xunto ao candidato do PP, Alberto Núñez Feijóo, no acto central da praza de touros de Pontevedra o primeiro domingo electoral.
Así, nos últimos metros desta carreira cara ás urnas, Rajoy fixo un alto en Lugo para facer un chamamento á “concentración do voto” nos populares e evitar quedar ás portas de gobernar polas fugas de apoios a outras formacións que, sen mencionar, situou na “irrelevancia”.
Máis de media hora para un percorrido duns 600 metros, ata a porta de San Pedro ou Toletana, unha porta romana que daba entrada á vía XIX procedente de Astorga e reedificada en 1781. Polo camiño, varias persoas achegáronse para saudar mentres que se impuxeron as fotos con bebés, nenos e nenas, maiores, persoas de mediana idade e mesmo algúns turistas.
Acompañado por, entre outros, Paula Prado, quen ironizou coa presenza do candidato socialista, Pedro Sánchez, “encerrado” nun auditorio na mesma xornada na que Rajoy pisa a “rúa” de Lugo; Rajoy xogouse a sorte “ao un”. O un do deputado que aspiran a sumar nestes comicios e o da terminación dos cupóns do Sorteo da Cruz Vermella que adquiriu á vendedora da Praza Maior, iso si, cun préstamo de Elena Candia, quen abonou o dez euros.
