A Deputación de Lugo finalizou a tempada de primavera de ‘Coñece a túa provincia’, a terceira edición do programa de viaxes gratuítas, con case 1.800 participantes dunhas 90 entidades e colectivos lucenses sen ánimo de lucro.
Segundo informou o goberno provincial, estas viaxes contribúen a impulsar a economía e o turismo de proximidade das poboacións onde se desenvolven as rutas. Desta forma, máis dun centenar de veciños dos concellos de Lugo, Cospeito e Triacastela serán esta semana os últimos participantes.
Este martes, os membros da Federación de Asociacións de Veciños de Lugo e da ANPA do IES Nosa Señora de Ollos Grandes realizaron unha ruta polo sur da provincia e A Montaña, respectivamente. O mércores, a Asociación de Veciños Cultural e Deportiva San Vicente de Pías, de Lugo, desprazaranse a Cervantes e Navia de Suarna tras coñecer a historia e as instalacións da sede provincial en San Marcos.
Por último, o venres protagonizarán unha última xornada os socios da Asociación de Xogos Tradicionais de Muimenta e os escolares da APA do CEIP, de Triacastela, que tras “achegarse aos segredos televisivos” na Produtora de Audiovisuais da Deputación, coñecerán o patrimonio natural e cultural da Fonsagrada, Negueira de Muñiz e da capital de Lugo. Así, tras os meses de verán a Deputación de Lugo continuará coa segunda quenda das viaxes da terceira edición deste programa que empezarán o 12 de setembro ata o 7 de novembro.
