A CIG desconvocou a folga do comercio de alimentación da provincia de Lugo tras a celebración de asembleas de traballadores este mércores e este xoves.

O sindicato sinalou que “o sentir que se trasladou por parte do persoal foi maioritariamente de desmotivación” respecto de secundar o paro, “tendo en conta que a traizón de UGT e USO asinando por detrás o convenio colectivo deixa sen efecto o obxectivo da folga”.

En todo caso, a central nacionalista advertiu de que esta desconvocatoria “non supón un paso atrás no firme convencemento e na necesidade de pelexar pola mellora das condicións de traballo no sector”. “Por iso, a patronal debe ter claro que a loita non acaba coa firma deste convenio de miseria que non responde as reivindicacións do conxunto do persoal”, sinalaron desde a CIG.

Finalmente, o sindicato sinalou que, “sendo un convenio insuficiente”, as mobilizacións conseguiron polo menos algunha mellora, e non se asinou a proposta inicial da parte patronal.