A Diocese de Lugo e a Axencia de Turismo de Galicia formalizaron un convenio para que a primeira aumente a acollida de peregrinos en tres trazados do Camiño de Santiago, segundo un comunicado.
O acordo permitirá non só aumentar esa acollida senón tamén o número de visitantes en cinco novas igrexas: Santa María da Fonsagrada e Santa María de Vilabade (Camiño Primitivo), San Miguel de Montefurado, San Salvador do Hospital de Quiroga (Camiño de Inverno), e San Nicolás de Portomarín (Camiño Francés); e a intención é estender este programa a algunha igrexa máis no Camiño Francés.
A de Lugo é a diocese española con máis quilómetros de rutas xacobeas e trasladou o seu “compromiso” coa atención ás persoas que realizan o Camiño de Santiago e tamén coa posta en valor do patrimonio cultural.
Segundo explicou, “as circunstancias pastorais, que dificultan unha acollida máis extensa, son suplidas con iniciativas propias das parroquias e da Diocese na misión de mellorar a experiencia de todas as persoas que se achegan ás nosas comunidades a través do Camiño”.
O convenio coa Xunta facilita a contratación de persoal para realizar este labor de acollida e atención ás necesidades dos peregrinos.
