A terceira xornada de folga no sector do metal da provincia de Lugo mantense convocada tras terminar sen acordo unha reunión entre os sindicatos e a patronal celebrada na tarde deste mércores e que se prolongou durante algo máis de dúas horas.
Con iso, uns 5.000 profesionais do ámbito siderometal e outros 2.000 do comercio do metal están chamados a secundar o paro este xoves.
O principal punto polo que seguen bloqueadas as negociacións é a reclamación dos representantes dos traballadores en relación co aumento do IPC.
Esta mesma semana, o martes, un 90% dos traballadores foron á folga, segundo os cálculos dos sindicatos, e centos de persoas volveron manifestarse para esixir un convenio “digno” que contemple incrementos salariais.
De non haber avances, hai novas datas de folga fixadas para os días 31 de maio, 2 de xuño e 6, 7 e 8 deste mes, e as organizacións sindicais avisan de que o seguinte paso é o paro de carácter indefinido.
