O ministro de Sanidade, José Miñones, participou este venres en Lugo nun curso de reanimación que Cruz Vermella desenvolve na Praza Maior, no marco do programa municipal ‘Lugo con Corazón’, onde destacou á capital lucense como a cidade “máis cardioprotexida” de España.
Por este motivo, sinalou que é “un orgullo” para todos os galegos e os cidadáns de Lugo e reivindicou a “aposta” do equipo de goberno de Lara Méndez “por esa liña”. “É un compromiso persoal da alcaldesa; un compromiso dirixido cara á saúde e aí non podiamos faltar”, manifestou.
Así mesmo, Miñones tamén aproveitou para felicitar á alcaldesa da capital lucense, Lara Méndez, polo recoñecemento como Festa de Interese Turístico Internacional do Arde Lucus, así como porque Lugo sexa coñecida como “cidade da ciencia e a innovación”.
Durante esta xornada, o titular de Sanidade tamén participou nun concerto de 700 alumnos con motivo da declaración do Arde Lucus como Festa de Interese Internacional e mantivo un encontro con representantes de colexios oficiais de médicos, enfermaría, odontoloxía, veterinaria e farmacia en Lugo.
