Os sindicatos CC.OO., UGT e CIG manteñen convocada a folga para este mércores 10 de maio no sector do metal da provincia de Lugo, despois de terminar sen acordo a reunión de mediación celebrada este luns no Consello Galego de Relacións Laborais.
Deste xeito, mantense o paro para este mércores e tamén os convocados para os próximos días 23 e 25 de maio, para reclamar un convenio colectivo “digno” que contemple maiores soldos. Segundo denuncian, os traballadores do metal de Lugo son os que perciben salarios máis baixos de toda a comunidade, e a patronal “non recoñece nin o IPC real deste ano nin dos seguintes” nas negociacións para actualizalos.
Por iso, están chamados a secundar a folga durante tres xornadas uns 5.000 profesionais do ámbito siderometal e outros 2.000 do comercio do metal.
