O Xulgado de Instrución número 1 de Vilalba acordou o ingreso en prisión provisional, comunicada e sen fianza para o detido como presunto autor do apuñalamento rexistrado o pasado fin de semana nun pub da localidade.
En concreto, segundo informou o Tribunal Superior de Xustiza de Galicia (TSXG), o detido pasou este martes a disposición xudicial e a xuíza tivo en conta, á hora de envialo a prisión, a “gravidade da pena” á que podería ser condenado por estes feitos e o “risco de fuga” dada a falta de arraigamento en Vilalba.
O home está investigado por un delito de lesións con obxecto perigoso ou de homicidio en grao de tentativa, algo que será concretado ao longo da instrución.
Os feitos producíronse ao redor das 4,30 horas da madrugada do domingo, cando unha disputa nun pub de Vilalba acabou en apuñalamento. O ferido foi trasladado a un centro médico e foi necesario darlle numerosos puntos de sutura, mentres que o presunto autor foi detido.
