Os hostaleiros de Lugo prevén unha “boa” campaña de Nadal, así como de fin de ano, en base aos rexistros de reservas para ceas de empresas e despedidas de ano, de familias e “cuadrillas” de amigos.
Así, o presidente da Federación de Hostalaría de Galicia e de Lugo, Cheché Real, asegurou que “as reservas para restaurantes van moi ben, con muchascenas de celebracións de empresa e despedidas do ano”.
“Polo número de reservas que teñen os establecementos de cara ao Nadal, a liña que leva é a mesma. Parece que nos recuperamos porque tiñamos medo pola subida da enerxía e dos carburantes, a inflación, que á fin e ao cabo nos afecta a todos”, secundou.
Real congratulouse de que “a tendencia é que se retoman as celebracións, as despedidas e tamén esperamos que o lecer nocturno teña un bo tirón”.
Outro aspecto que puxo en valor é o que ten que ver “coa ocupación hoteleira, mesmo de lucenses de toda a provincia que veñen de fóra e veñen a Lugo a pasar o Nadal aquí”.
En canto á ocupación, Cheché Real destacou que “a que houbo na ponte (Constitución) roldou o 80 por cento en Ribeira Sacra, o 75 por cento en Lugo capital e o 65 por cento na Mariña”.
Desta forma subscribiu que “se a tendencia segue sendo esta, a ocupación que se prevé en Nadal para a provincia de Lugo vai ser tamén magnífica”.
