Os populares de Lugo denuncian que, dous anos e dous meses despois da súa recepción, o auditorio de Magoi segue sen abrir as súas portas e acusan o bipartito local –PSdeG e BNG– de querer “enredar” como tapadeira da “súa incapacidade á hora de xestionar a infraestrutura”.
O Partido Popular reclama saber se os técnicos do Concello xa se reuniron co gabinete externo de arquitectos que contratou a alcaldesa “con diñeiro público para reformar ao seu antollo o exterior do Auditorio de Magoi e para liquidar as deficiencias detectadas no inmoble”.
Os populares aseguran que, a principios de xullo, o executivo local prometeron axilizar contactos, pero lamentan que “a día de hoxe o tempo pasa e nada se sabe de como se van a solucionar os peros que puxeron os propios técnicos municipais á nova proposta de alcaldía”.
O concelleiro popular Óscar Poy lembra que as obras a levar a cabo no edificio público “son case todas no exterior, o que evidencia unha falta de mantemento por parte dos seus responsables”. Ademais, critica que unhas obras que deberían custar 300.000 euros terán agora un custo próximo ao millón.
O PP lembra que “se está falando de que o 70% da intervención é obra nova no exterior, por tanto, o máis responsable debería ser facer unha chamada ao estudo Paredes-Pedrosa, que foi quen deseñou o proxecto”.
