A xunta de goberno do Concello de Lugo licitará este mércores o proxecto para o ascensor do Sagrado Corazón. A infraestrutura, ideada en 2012, fora licitada en 2014 pero a adxudicataria das obras renunciou ao contrato. Para reiniciar o proceso, o executivo que dirixe Lara Méndez tivo que solventar a cuestión da titularidade da parcela, obtendo en xullo deste ano a cesión da parte correspondente a Abanca. A obra consigna 252.000 euros reservados nos Orzamentos de 2018.
Como transmitiu a alcaldesa á veciñanza do barrio, o prazo de execución será de catro meses, polo que o ascensor debería entrar en servizo a comezos de 2019. A estrutura quedará instalada á beira da escalinata da Avenida Adolfo Suárez, que salva 6,75 metros ata a igrexa; secasí, a intervención que plantexa o Concello abrangue 11 metros de desnivel a través dunha plataforma.
O ascensor constará por tanto de tres paradas: a rúa inferior, a praza da igrexa e a cota superior, que enlazará co soportal a carón do CEIP Sagrado Corazón. O segundo nivel contará cunha plataforma de 5 metros, mentres que a do terceiro acadará os 16 metros. A instalación construirase cun formato panorámico.
A actuación contempla o traslado da parada de bus urbano –na actualidade na rotonda entre a avenida e Serra de Meira– canda o ascensor, instalando mobiliario urbano, con bancos e marquesiña. Complementarase coa construcción dun treito de muro e outra escada que salvará o baleiro na saída do colexio. Así mesmo, habilitarase un sendeiro peonil adaptado, o aparcadoiro quedará limitado na zona máis transitada, haberá nova iluminación e novos acabados para o soportal e a medianeira.
En total, a intervención abrangue 320 metros cadrados. O segundo ascensor proxectado en Lugo abrangue unha área pequena, explican no Concello, pero con gran influencia na mobilidade e o acabado físico da contorna. Dará servizo a 816 habitantes do Sagrado Corazón, caracterizado pola presenza de persoas de avanzada idade, conectando o centro de saúde, o colexio e o centro de convivencia.
De xeito paralelo, o goberno local iniciará o aglomerado do acceso á igrexa, e rematará a pavimentación das rúas Fonmiñá e Piñeiral, cun orzamento conxunto de 117.000 euros para estas actuacións.
