Unha persoa tivo que ser excarcerada tras saírse da vía e resultar ferida de gravidade en Xermade na madrugada deste luns. O ferido foi trasladado ao Hospital Universitario Lucus Augusti de Lugo.
Ás 1,15 horas desta madrugada, o 112 Galicia atendía a chamada dun particular que informaba dunha saída de vía na LU-P-2205, en Xermade. Aínda que nun primeiro momento non parecía necesaria a excarceración do condutor do vehículo, único implicado no accidente, os servizos sanitarios solicitaron finalmente a colaboración dos Bombeiros de Vilalba pola imposibilidade de extraer o ferido sen poñer en risco a súa seguridade.
Ante as difíciles condicións polo estado en que quedara o turismo, os efectivos dos Bombeiros que se presentaron no lugar procederon a excarcerar por completo o teito do vehículo para evacuar o condutor, quen recibiu asistencia sanitaria no punto antes de ser trasladado ao centro hospitalario.
Por último, requiriuse a intervención dos servizos de mantemento da estrada para despexar a vía e restablecer por completo a circulación.
