A falta de auga que deixa a seca na provincia de Lugo é máis perentoria na parte sur, ata o punto de que no municipio de Ribas de Sil algunhas parroquias necesitaron camións cisterna para abastecerse.
O alcalde, Miguel Ángel Sotuela, recoñece que hai un “problema importante” no seu concello, dado que “nalgúns núcleos que teñen augas veciñais” precisaron este reforzo.
Ademais, o Concello xa colocou “bandos en parroquias” para fomentar “que haxa aforro” no consumo deste recurso –como, por exemplo, evitar baldeos e lavados de coches– nesta localidade lucense que linda coa provincia de Ourense.
“Baixou moitísimo o nivel do río Sil, que é onde bombeamos auga e baixou tamén o caudal do arroio do que collemos auga e logo saneamos potabilizándola”, lamenta. Iso si, a zona menos castigada é San Clodio, a capitalidade do municipio e por onde pasa o Sil. “Non vai secar o río”, reflexiona o rexedor.
