A Policía Local de Lugo auxiliou este pasado fin de semana a un parrulo salvaxe ferido que sangraba pola zona da cola e a unha aguia que acharon axentes inmóbil no paso do Miño.

Segundo informou a Policía Local, na tarde do pasado 24 de xuño unha patrulla da Unidade Territorial de Policía de Barrio acudiu á rúa Álvaro Cunqueiro onde había un parrulo ferido, que sangraba pola zona da cola. Por iso, axentes sacárono da zona de vexetación e o pato foi trasladado ao hospital veterinario Rof Codina para recibir asistencia, sinalaron as mesmas fontes municipais.

E na tarde do 25 de xuño unha patrulla localizou no paso do Miño, preto do Club de piragüismo, a unha aguia que, puntualizan as mesmas fontes policiais, “estaba completamente inmóbil e non reaccionaba” ante a presenza dos policías. Foi rescatada polos axentes e trasladada ao hospital veterinario Rof Codina.