A Policía Local de Lugo denunciou a tres gorrillas por realizar a actividade ilegal de aparcacoches na contorna do Hospital Universitario Lucus Augusti (HULA).
Segundo informou a Policía Local, no marco dun dispositivo especial establecido na contorna do HULA onde efectivos da Unidade Territorial de Policía de Barrio, con vehículos rotulados e camuflados, sorprenderon a tres persoas que realizaban a actividade ilegal de aparcacoches.
Os individuos ocupaban a calzada para indicar aos condutores, destacan as mesmas fontes, lugares libres de aparcadoiro, “pondo en risco a súa integridade física”.
Unha vez denunciadas, estas persoas foron sorprendidas de novo nas mesmas circunstancias, polo que foron denunciadas por infracción á Lei de Seguridade Cidadá ao “desobedecer as ordes dos axentes no exercicio das súas funcións”, indican as mesmas fontes, e as actas foron remitidas á Subdelegación do Goberno.
AUXILIOS
Por outra banda, sobre as 9,20 horas deste pasado 8 de xuño unha patrulla da Unidade Territorial de Policía de Barrio procedeu a auxiliar a un home tirado na Avenida da Coruña, en Lugo, quen presentaba “signos de embriaguez”. Colocárono en posición de seguridade e solicitaron unha ambulancia do 061 na que se trasladou ao HULA para recibir asistencia.
Ademais, na tarde dese mesmo día, un cidadán acudiu á xefatura municipal para denunciar que cando paseaba cun familiar polo barrio de San Fiz perdera o contacto visual con esta persoa de avanzada idade e con problemas de mobilidade, polo que solicitou auxilio á Policía Local para buscalo. Así, foi localizado de inmediato por unha patrulla resgardado da choiva xunto a un edificio.
