O edificio do Concello de Palas de Rei amenceu este martes cunha serie de pintadas na súa fachada contra a instalación no municipio dunha fábrica da compañía de téxtiles ‘Altri’.
Nas pintadas, feitas en tinta verde, poden lerse consignas como ‘Industria veleno non’, ‘Eucaliptos non’ ou ‘Non á industria lixo’, entre outros.
O concello xa puxo unha denuncia de maneira oficial para atopar ao autor destas pintadas. O alcalde, Pablo Taboada, lamentou estes feitos e lembrou que “todas as persoas que teñan algún tipo de queixa ou suxestión” teñen “canles reguladas para mostrar a súa desconformidade sen atentar contra o patrimonio dos veciños”.
Este mesmo luns, o Concello de Palas de Rei informaba de que xa conta coa “leira” onde finalmente se situará a fábrica de fibras téxtiles da multinacional portuguesa Altri.
A leira decidida está entre Palas e Melide, segundo informou o alcalde, e linda case con tres provincias: Lugo, A Coruña e Pontevedra. Trátase dun solar “moi grande, dunha peza, que está á beira da autovía porque a autovía (a Santiago) cruza esa leira por unha esquina”, concretou o rexedor.
Agora, indica o alcalde, “hai que empezar con toda a tramitación administrativa, dado que é un proxecto supramunicipal, e logo ver se hai que facer algunha modificación do plan para adaptalo á singularidade da fábrica”. O escenario é que estea operativa nun prazo de dous a dous anos e medio.
