Un condutor foi multado con mil euros e a retirada de seis puntos do carné de condutor tras duplicar a taxa máxima de alcoholemia permitida despois de desviarse da súa traxectoria e chocar contra un turismo estacionado na cidade de Lugo.
Segundo informou a Policía Local de Lugo, ás 16,00 horas deste pasado 1 de maio un equipo de Atestados desprazouse á rúa Tui porque se produciu un accidente de circulación no que un vehículo se desviou da súa traxectoria e chocou con orto que acaba de aparcar e o seu condutor aínda se atopaba no seu interior.
As mesmas fontes sinalaron que, debido ao impacto, desprazouse o vehículo estacionado e chocou á súa vez cun terceiro. Os axentes observaron que o condutor que provocou o accidente presentaba “signos de embriaguez”, polo que foi sometido a un control de alcoholemia. Na proba o condutor obtivo positivo de 0,50 mg/l, polo que se abriu expediente sancionador con multa de mil euros e a retirada de seis puntos do permiso de conducir. Pola súa banda, concretou a Policía Local, o condutor do vehículo estacionado necesitou asistencia sanitaria.
