A Garda Civil abriu dilixencias de investigación con respecto a seis persoas, traballadores de tres empresas, que foron sorprendidos cando trataban de desfacerse ilegalmente de toneladas de xurros, enterrándoas nunha leira en Guntín.

Segundo informaron fontes do Instituto Armado, efectivos do PACPRONA de Lugo sorprenderon aos investigados cando se atopaban realizando traballos de extracción do xurro e procedían a verterlo en dous grandes ocos escavados no terreo dunha leira, que logo ían tapar.

Dáse a circunstancia de que, ademais de desfacerse dos residuos de forma ilegal, pretendían facelo nun espazo polo que discorre un regato. Para iso, estaban a empregar maquinaria pesada: unha retroexcavadora e dous camións.

Os investigados, que xa foron postos a disposición xudicial, son empregados dunha empresa de escavacións e obras, outra de transportes, e unha Sociedade Agraria de Transformación (SAT) de gando vacún, de onde procedían os xurros.