A Policía Local de Lugo propuxo para sanción de 900 euros cada un a 17 mozos por ouriñar na vía pública na Catedral e noutros puntos do centro histórico lucense.

Segundo informou a Policía Local de Lugo, durante a madrugada do pasado sábado 6 ao domingo 7 efectivos do Grupo Operativo Nocturno estableceron un dispositivo especial para “combater as condutas incívicas que algúns mozos levan a cabo no centro histórico”.

Como consecuencia deste operativo tramitáronse 17 actas de denuncia por infracción á Lei de Residuos de Galicia ao sorprender na Catedral e na Travesía do Miño, especialmente na Fonte Miñá, a 16 mozos e unha moza que ouriñaban na vía pública.

Por iso, os axentes propuxeron a cada un deles sancións de ata 900 euros co agravante de ser cometidas estas condutas no centro histórico da cidade.