Instituciones Penitenciarias investiga dous vídeos gravados por internos do centro Penal de Monterroso nos que aparecen consumindo droga e presumindo de ter obxectos prohibidos, como un teléfono móbil ou unha tatuadora.
Segundo informa “El País”, polo menos sete presos participaron na gravación clandestina dos vídeos a semana pasada na “sala de día” dun dos módulos do centro onde os presos realizan actividades ou ven a televisión baixo a vixilancia de, polo menos, un funcionario de prisións.
Fontes de Instituciones Penitenciarias explicaron a Efe que se están investigando os vídeos e identificando aos presos que interviñeron nesa gravación.
Interior tamén trata de esclarecer a procedencia do móbil e como os internos puideron conseguir as sustancias e o material prohibido para os presos que se mostra nas imaxes.
Ademais, tenta aclarar se os presos non tiñan vixilancia no momento no que se gravaron as imaxes, tal e como explica un deles nos vídeos, mentres outro afía un obxecto e un terceiro fai unha tatuaxe nas costas a un compañeiro cunha máquina.
