O condutor dunha moto obtivo positivo no test de alcol e drogas despois de sufrir un accidente ao caerse dun ciclomotor na cidade de Lugo. Segundo informou a Policía Local, o pasado 17 de xullo produciuse un accidente de circulación no que o condutor dun ciclomotor perdeu o equilibrio e caeu ao chan na confluencia da rúa Vilalba coa Praza de Xaquín Lorenzo ‘Xocas’.
Un equipo de Atestados da Policía Local de Lugo acudiu ao lugar e comprobou que o condutor sufrira feridas, polo que se requiriu a presenza dunha ambulancia para o seu traslado ao Hospital Universitario Lucus Augusti (HULA).
Os axentes, detectaron “signos de embriaguez”, destacan as mesmas fontes, solicitaron orde xudicial para a realización dunha análise de sangue co fin de comprobar a presenza no organismo de sustancias estupefacientes e alcol, que foron autorizados pola autoridade xudicial.
O resultado emitido polo laboratorio, apuntan as mesmas fontes municipais, conclúe que o individuo conducía cunha taxa de alcol en sangue de 1,32 gramos e obtivo positivo en cocaína e cannabis. Por iso instruíronse dilixencias para o xulgado de garda por un delito contra a seguridade viaria.
