A conselleira de Infraestruturas e Mobilidade, Ethel Vázquez, volveu a pedir este sábado ao Goberno central que programe e realice os investimentos necesarios para garantir o “acceso real” da provincia de Lugo á alta velocidade ferroviaria.
Así se pronunciou durante unha visita realizada a Monforte de Lemos, con motivo da apertura ao público do Museo do Ferrocarril de Galicia, acompañada do delegado da Xunta en Lugo, Javier Arias.
Neste contexto, Vázquez confirmou que a entrada en servizo do AVE na Comunidade galega espérase para “este mesmo outono”, polo que a seguinte “prioridade” para a a Xunta será estender a liña de alta velocidade ata a cidade de Lugo, vía Monforte.
Así, a conselleira sinalou que “a día de hoxe” ningunha das obras relevantes para facer disto unha realidade comezou, a pesar de que en “os últimos meses” si houbo un “impulso” para mellorar a rede ferroviaria entre Ourense e Lugo e de que hai un “compromiso” por parte do Ministerio de Transportes, Mobilidade e Axenda Urbana.
Ademais, Ethel Vázquez expresou a “preocupación” da Xunta por que a última planificación de actuacións presentada polo Goberno central “elimina o compromiso desas variantes” que fan “competitiva” as conexións cara a Lugo.
Por iso, remarcou que a Xunta seguirá insistindo para que a liña Monforte-Lugo-A Coruña forme parte do trazado do Corredor Atlántico de Mercadorías e así poder optar a fondos extraordinarios de financiamento da Unión Europea.
De feito, a conselleira de Infraestruturas lembrou que esta demanda foi “aceptada” pola Comisión do Arco Atlántica e xa está “presentada” ante as autoridades comunitarias, polo que espera “contar co apoio do Goberno de España”. “Estamos convencidos de que así será”, agregou.
