O Concello de Lugo pon en marcha un certame na rede social Tik Tok para promover a igualdade de cara ao Día Internacional da Muller e loitar contra as violencias machistas.

Para participar na iniciativa, impulsada pola Concellería de Muller, Igualdade e Xuventude, basta con subir un vídeo á plataforma Tik Tok co cancelo #Lugopolaigualdade e cubrir un formulario de inscrición. A temática vira arredor da igualdade de xénero en calquera dos seus ámbitos, a denuncia de relacións tóxicas, o empoderamento ou a detección de micromachismos, entre outros.

A duración máxima dos vídeos será de 60 segundos e pódense empregar todas as posibilidades creativas que ofrece Tik Tok, rede social que foi escollida por ser tan usada entre a mocidade. 

O certame conta don dous premios: un primeiro premio dotado con 200 euros e un segundo galardón dotado con 100 euros. A data límite para a inscrición é o 10 de marzo de 2021 e as persoas gañadoras daranse a coñecer o 16 de marzo. Como requisito, é necesario que a persoa participante viva, estude, traballe ou nacera en Lugo.