A área sanitaria de Lugo experimentou unha redución do número de persoas ingresadas con coronavirus, que pasaron das 87 que comunicaba onte o Sergas ás 76 que refire neste martes de Entroido. Delas, 26 permanecen na Unidade de Coidados Intensivos do Hospital Universitario Lucus Augusti, mentres que as outras 50 están a ser atendidas en planta (31 no HULA, 5 na Mariña e 14 en Monforte).
É a primeira baixada significativa da presión asistencial logo de varios días de descenso de casos activos, unha tendencia que segue activa tamén hoxe. Sanidade conta 1.129 pacientes con infección activa (42 menos) e nas últimas horas confirmáronse 34 diagnósticos a través de PCR. Ben é certo, porén, que a cifra de probas efectuadas nesta xornada (581) foi moi inferior á habitual.
Por outra banda, na tarde de onte tamén se coñecía o falecemento de catro persoas da provincia que foran diagnosticadas de Covid-19. Desta maneira, o Sergas notifica 195 vítimas mortais en Lugo dende o inicio da pandemia. Na beira contraria, curáronse 10.017 persoas e realizáronse 177.425 PCR.
GALICIA
En Galicia, o número de casos activos por coronavirus tamén segue á baixa (12.464: 588 menos), segundo os últimos datos facilitados polo Sergas, que á súa vez informa de que a presión hospitalaria marca tamén unha curva descendente, especialmente no que respecta a pacientes críticos. Podes ler a información completa no Galicia Confidencial.
