EFE | O presidente da asociación que agrupa aos directores de centros de educación públicos da provincia de Lugo, José Manuel Valcarce, recoñece que o incremento de casos de coronavirus tras o Nadal está a vivirse “con moita preocupación” e “moita tensión” por parte do persoal de colexios e institutos.
“Temos en máximos as alertas”, dixo Valcarce a EFE, porque “do mesmo xeito que sucede en xeral” con esta terceira onda da pandemia, a “situación é tamén moi complexa nos centros educativos”.
Nese sentido, precisou á prensa que nos centros educativos están a realizarse nestes momentos “moitos trámites” para manter a actividade lectiva, “illando xente, chamando e contactando para realizar seguimentos”. “Está a haber moita loita para que isto non se estenda”, explicou, para localizar canto antes os casos positivos e evitar que se poida propagar o virus dentro dos propios centros.
Trátase, dixo, de facer todo o posible para “garantir as clases presenciais nos centros”, porque os docentes consideran que son “básicas para os alumnos”.
CASOS ACTIVOS
Neste momento, na provincia de Lugo hai 330 positivos en centros educativos, con oito aulas e tres escolas pechadas. Destacan o IES Río Cabe de Monforte de Lemos, con 27 casos, e o IES Santiago Basanta Silva, con 15 contaxios.
