A Federación Provincial de Asociacións de Veciños Lucus Augusti remitiu un escrito á Xunta de Galicia para lembrar que “como anunciou a Consellería de Sanidade o pasado 22 de setembro, é o momento no que indicou que se tomaría a decisión oportuna respecto do párking do HULA“. O colectivo insiste na necesidade de liberalizar os seus custos, unha reivindicación que xa se vén facendo dende os inicios.
Reclaman a liberalización do aparcamento por considerar os custos “abusivos e fóra de lugar”, ademais de que o espazo foi cedido gratuitamente por Lugo ao Sergas. “Pagamos tarifas máis altas que na Coruña, Vigo e Ourense, onde o Sergas tivo que comprar os terreos”, lamentan.
Se non fose posible a liberalización total, piden que se transmita a xestión a un ente social ou ONG lucense que atenda a persoas en estado precario ou de dependencia. “Que se cobre só o custo mínimo e cunha praza libre por enfermo ingresado, así como unha primeira hora gratuíta para acceso a consultas ou outras visitas”, propoñen, ademais dos fins de semanas libres de pagamento.
Dende a Federación non se conforman coa “desculpa” do Sergas de que a actual concesión implica o coidado das zonas verdes, xa que o colectivo faríase cargo do mantemento de forma gratuíta. “Cremos no dereito das nosas peticións e xa van dez anos sen unha resposta“, quéixanse.
